ગઝલ
-જુગલકીશોર————–
-જુગલકીશોર————–
સાંભળું તો કંઈક સંભળાવે ગઝલ,
સાનમાં એ કંઈક સમજાવે ગઝલ.
શબ્દની છલના,શી લીલા આ બધી-
અર્થને જ્યાં શોધું, ટટળાવે ગઝલ!
શબ્દના ઘોંઘાટ વચ્ચે આટલા
કાન પાસે હોઠ ફફડાવે ગઝલ.
શબ્દના રસથાળ વણબોટ્યા રહ્યા,
સ્વાદની કૈં યાદ મમળાવે ગઝલ.
સાત સાગર ઉછળે અંદર બધા,
અંજલીમાં ઓઘ છલકાવે ગઝલ.
આભથી દરીયાની વરસે વેદના,
આંખથી બે, શબ્દ ટપકાવે ગઝલ.
ક્યાંકથી સંતાપની સાપણ ડસે-
અંગ અંગે દાહ પ્રસરાવે ગઝલ.
સોગઠાંને ગોઠવ્યાં ચોપાટ પર
ચાલ ચાલે એવી, અકળાવે ગઝલ.
શબ્દનો ધ્વજ આભ ફરકાવે ગઝલ,
અર્થને પાતાળ સરકાવે ગઝલ !
Posted in ગઝલ
