–જુગલકીશોર.
કહેવાનું નામ પત્રો, વહેવાનું નામ પત્રો;
સેતુના અભાવોમાં સહેવાનું નામ પત્રો.
કાગળના કોઈ ટુકડાના ભાગ્યમાં નથી જે
ખુદ’પાત્ર’બની જઈને રહેવાનું નામ પત્રો.
જેનાં હજાર નામો, જેના ઘણા મુકામો
એવા હરીને ગામ ઠહરવાનું નામ પત્રો.
===00===
ધરતીનું પીને ધાવણ, વૃક્ષોની ઘટાઓમાં
લીલી સુગંધ થઈ, મહેકવાનું નામ પત્રો.
કરતાલના અવાજે દોડી પડે જે ક્ષણમાં,
તુલસીનો સ્વામી,એને વરવાનું નામ પત્રો.
બ્રહ્માંડથીય ભારે, અખીલાઈથી વધારે,
એ બ્રહ્મને ‘તુલા’માં હરવાનું નામ પત્રો.
પુષ્પમ્,ફલમ્,કે તોયમ્ અર્પી શકાય ના તો
પત્રમ્ રુપેય એને ભજવાનું નામ પત્રો.
